- Å ha eit nettverk og kvarandre er viktig!

Over 100 deltakarar frå 30 av 43 kommunar i Vestland og ei rekkje kompetansemiljø i fylket var samla. Gode faglege innlegg, erfaringsdeling, gruppediskusjonar og “stjel og del”-standar la til rette for kunnskapsutveksling og inspirasjon. Dette gjorde samlinga både nyttig og lærerik for kommunane og fagmiljøa som deltok.

«Hjartesamling»

- Vi vaksne må skape anledningar der barn kan fortelle. «Hjartesamling» er ei slik anledning!

Trude Lundekvam er fagansvarleg ved Nok. Sogn og Fjordane, og oppfordrar alle kommunar til å legge til rette for at barn i barnehagen får slike anledningar, at barnehagen har struktur for opplæring til både tilsette og barna i barnehagen.

Hjartesamling gir barn kunnskap om 5 ulike tema som alle barn burde lære om i barnehagen:

• Berøring
• Følelsar
• Venskap
• Kroppen
• Hemmelegheiter

- Mange barnehagar snakkar allereie om desse tema med barna, men det må settast i system, det må inn i årshjulet, seier Trude.

E det greitt?

Det har Kvinnherad kommune og Ullensvang kommune tatt på alvor. Gjennom prosjektet “E det greitt” har dei systematisert arbeidet for å sikre at barn og unge får opplæring om vald og overgrep og kvar dei kan få hjelp. Kommunane har bestemt at alle barnehager og skular skal ha eit "Barnas verneombod" og alle skal ta i bruk opplæringsressursen Jeg vet i opplæringa. Kommunane jobbar vidare med å digitalisere materialet sitt slik at fleire kommunar kan gjere nytte av det.

Plan for perinatal mental helse

Plan for perinatal mental helse kan gjere at fleire sårbare familiar vert fanga opp. Voss herad har utvikla ein eigen plan for perinatal mental helse (mental helse under svangerskap og etter fødsel). Det er eit samarbeid mellom Voss DPS, NKS Bjørkeli, BUP Voss, Fødeavdelinga ved Voss sjukehus, helsestasjon, barnevern og PPT.

- Det å verte foreldre er ei endring i livet, seier Sveinung Nygård, kommunepsykolog i Voss. - For dei som allereie har vanskar knytt til psykisk helse, er svangerskap, fødsel og barseltid ei sårbar tid.

- Barn er avhengige av sine foreldre og det tidlege samspelet er avgjerande for tilknyting og utvikling. Psykisk lidelse hos foreldre aukar risikoen for at barnets behov kjem i andre rekke. Planen har flytskjema for ulike vanskar knytt til svangerskap, fødsel og spedbarnstid, der det går fram kven som kan hjelpe med kva.

Nygård seier at dei ser gode resultat av satsinga så langt; fleire tilvisningar til kommunepsykologane og betre samarbeid og lågare terskel mellom tenestene. Voss herad håper dette bidreg til at fleire sårbare foreldre og barn vært fanga opp og får tidleg hjelp.

Kunnskapsreisen

Vaksdal kommune har i fleire år jobba med å systematisere arbeidet med å oppdage og hjelpe barn og unge som strever. Dei brukar Kunnskapsreisen som opplæring i dei ulike tenestene. Rektor ved Dale skule, Malin Sæterdal, delte skulen sine erfaringar med Kunnskapsreisen. Engasjerte tilsette har gjort at dei har brukt meir tid på samlingane enn det som er satt opp. Dei har og brukt andre ressursar i arbeidet; Snakkemedbarn.no, Jeg Vet, Trygg til handling, Seksuellatferd.no med meir.

Skulen har sjekka ut korleis dei tilsette erfarer opplæringa og har fått gode tilbakemeldingar:

«Eg har blitt meir bevisst på førebygging og å tolke signal»

«Eg er mindre redd for å ta tak i tematikken og stille dei rette spørsmåla»

«Eg er tryggare på kva eg skal gjere om eg har mistanke»

Rektorane opplever at tilsette er tryggare, både i klasserommet og i foreldremøte. Kunnskapsreisen er lett å gjennomføre og legg til rette for gode samtalar.

- Ved å setje fokus på dette i klasseromma, opplever vi at elevane våre er meir bevisste på eigne grenser, kva som er lov og ikkje, og at dei har eit språk for tematikken, avsluttar Malin.

Både Kunnskapsreisen og Traumeskulen

I 2024 vart det politisk vedtatt å tilsette oppvekstrettleiar i Vaksdal.

Kommunen gjennomførte ei nullpunktskartlegging for å sjekke kunnskap og kompetanse hos tilsette som i sitt arbeid møter barn og unge. Resultata viste at det var behov for felles kompetanseheving.

I tillegg til Kunnskapsreisen har tverrfagleg rettleiingsteam gjennomført Traumeskulen slik at dei kan bistå med gjennomføringa ut i tenestene i andre omgang. Teamet møtast èin gong i månaden og har gått gjennom eitt tema kvar gong.

Det er kompliserte tema og kunnskap som vert formidla på ein enkel måte, er ei av tilbakemeldingane oppvekstrettleiar Jannike Sandvik har fått om Traumeskulen, som er utvikla av RVTS Vest og RKBU Vest.

Påmelding til neste samling

Neste samling i nettverket er 31. oktober, og føregår digitalt. Meld deg på neste samling.